Nú eru aðeins tveir leikir eftir hjá íslenska karlalandsliðinu í undankeppninni fyrir HM í Rússlandi sem fram fer næsta sumar. Ísland er í 2. sæti eins og er eftir marga flottar frammistöður. Eftir 180 mínútur af fótbolta (plús uppbótartíma) vitum við hvort Ísland sé á leið til Rússlands, fari í umspil um sæti á HM eða sé úr leik. Allt getur gert en það er algjörlega í höndum okkar manna að tryggja sér í það minnsta umspilsviðureign.
A-landslið karla,
undankeppni HM í Rússlandi 2018.
9. umferð í I-riðli,
föstudagurinn 6. október 2017,
klukkan 18:45 (21:45 að staðartíma).
Tyrkland – Ísland
Völlur: Eski?ehir Yeni Stadyumu í Eski?ehir í norðvesturhluta Tyrklands. Þetta er nýr völlur, tekinn í notkun árið 2016 og er heimavöllur knattspyrnuliðsins Eski?ehirspor. Hann tekur 34.930 áhorfendur í sæti.
Dómari: Szymon Marciniak frá Póllandi.
Veðurspáin: Það verður sólskin og 20-25 stiga hiti yfir daginn en þar sem leikurinn er spilaður seint að staðartíma verður sólin sest og þá kólnar töluvert. Ætti þó að vera 11-13 stiga hiti á meðan leik stendur, heiðskírt, úrkomulaust og léttur vindur. Gæti verið töluvert verra.
Tólfufjörið yfir leik
Stuðningsfólk Íslands á höfuðborgarsvæðinu (og auðvitað líka það sem nennir að ferðast utan af landi) er velkomið í landsleikjapartý Tólfunnar á Ölveri.
Á Facebooksíðu Tólfunnar má finna event fyrir partýið. Samkvæmt því byrjar þetta klukkan 18:00 en auðvitað er tilvalið að fólk mæti sem fyrst og byrji að hita upp fyrir leikinn. Mætum bláklædd, kát og peppuð!
Tyrkland
Ef þessi leikur væri viku síðar, 13. október, þá væri hann spilaður nákvæmlega 2 árum eftir að liðin mættust síðast í Tyrklandi. Sá leikur var lokaleikurinn í undankeppninni fyrir EM í Frakklandi. Upphitun fyrir þann leik má sjá hérna.
Ísland var þegar búið að tryggja sig inn á EM en Tyrkland hafði meiri hvatningu í leiknum þar sem þeir voru ekki á leið til Frakklands fyrir leik. Þeir náðu að merja 1-0 sigur með marki úr aukaspyrnu í lok leiksins og tryggðu sig inn á EM sem þriðja liðið úr þeim riðli.
Ef þessi leikur væri hins vegar 3 dögum síðar, 9. október, þá væri hann spilaður nákvæmlega ári eftir að liðin mættust síðast, þá í Laugardalnum þegar liðin spiluðu fyrri leik sinn í þessari undankeppni. Upphitun fyrir þann leik má sjá hérna.
Ísland kann vel við að mæta Tyrklandi á heimavelli og líkt og í undankepnninni á undan þá vannst öruggur sigur á Tyrkjunum. Í þetta skipti var það 2-0 með einu tyrknesku sjálfsmarki og svo alíslensku marki frá Alfreð Finnbogasyni.
Staða á styrkleikalista FIFA: 27. sæti
Gengi í síðustu 10 landsleikjum: J J T S S S J S T S
Markatala í síðustu 10 landsleikjum: 15-9
Tyrkland hefur spilað 13 leiki í röð á heimavelli án taps. Síðasti tapleikur á heimavelli var vináttuleikur gegn Brasilíu í Istanbul 12. nóvember 2014. Mánuði fyrr hafði liðið einnig tapað gegn Tékklandi á sama stað, það var leikur í undankeppni EM.
Af þessum 13 taplausu leikjum í röð hefur Tyrkland unnið 10 og gert 3 jafntefli. Markatalan frá síðasta tapi er komin upp í 25-6. Liðinu mistókst að skora gegn Brasilíu í síðasta tapleik, eftir það hefur liðið skorað í öllum leikjum nema í markalausu jafntefli gegn Rússlandi.
Tyrkland er með 14 stig í I-riðlinum, 10 þeirra hafa komið á heimavelli. Liðið hefur skorað 12 mörk í riðlakeppninni og þau hafa dreifst á milli 6 leikmanna. Sá markahæsti þeirra er framherjinn Cenk Tosun, leikmaður Be?ikta?, sem hefur skorað 3 mörk í keppninni. Öll mörkin hans komu í Tyrklandi, tvö í 2-0 sigri á Finnlandi og eitt í 1-0 sigri á Króatíu.
Tosun verður í hópnum gegn Íslandi en annar hættulegur leikmaður, spyrnusérfræðingurinn Hakan Çalhano?lu, verður ekki með liðinu þar sem hann tekur út leikbann. Munar ansi miklu um það.
Ísland
Staða á styrkleikalista FIFA: 22. sæti
Gengi í síðustu 10 leikjum: T S S T T S S S T S
Markatala í síðustu 10 leikjum: 10-6
Fimm sigrar, eitt jafntefli, tvö töp. 11 mörk skoruð, 7 mörk fengin á sig. Annað sætið í riðlinum, á markatölu, eftir 8 leiki af 10. Íslenska karlalandsliðið var umspilsviðureign frá því að komast á síðasta HM, fór á lokamót EM og er hér í hörkubaráttu um að komast strax á næsta stórmót. Svona er einfaldlega staðan á þessu landsliði okkar. Hvílík skemmtun!
Það eru fjögur lið af sex sem eiga enn séns á efstu tveimur sætunum. Tap væri slæmt í þessum leik, miðað við leikina sem eftir eru. Jafntefli væru fín úrslit. Sigur myndi fara langt með þetta. Tyrkirnir líta hins vegar á það þannig að þeir gjörsamlega verði að vinna þennan leik. Það gæti hentað okkar liði. Því lengur sem vörnin heldur, því meiri örvænting gæti komið í þetta tyrkneska lið.
Gylfi Þór Sigurðsson hefur komið beint að 6 mörkum af 11 sem íslenska liðið hefur skorað í riðlinum. 3 mörk og 3 stoðsendingar. Það eru engar ýkjur að segja að hann sé mikilvægur fyrir liðið okkar. Alfreð Finnbogason hefur einnig skorað 3 mörk og Kári Árna er næstur á stoðsendingalistanum með 2 stoðsendingar.
Emil Hallfreðsson átti frábæran leik gegn Úkraínu í síðasta leik Íslands en missir því miður af þessum leik vegna þess að hann tekur út leikbann vegna gulra spjalda. Þá hefur fyrirliðinn okkar, kafteinn Aron Einar Gunnarsson, verið í kapphlaupi við tímann um að ná sér góðum af meiðslum. Það væri illt að vera án þeirra beggja en við vonum að Aron verði búinn að jafna sig. Í öllu falli treystum við á þennan flotta hóp og við treystum að þjálfarateymið sé með flott leikplan hvort sem Aron nær leiknum eða ekki.
Dómarahornið
Dómarinn í þessum leik verður hinn pólski Szymon Marciniak. Hann fæddist 7. janúar 1981 í borginni P?ock í miðju Póllandi. Hann spilaði sjálfur knattspyrnu lengi framan af.
Þegar hann var í kringum tvítugt fékk hann eitt sinn rautt spjald í leik. Hann var hreint ekki sáttur við þá ákvörðun og lét dómarann vita af því. Hann notaði ansi skrautlegan orðaforða til að segja dómaranum hversu lélegur hann væri. Dómarinn svaraði honum einfaldlega með því að segja að ef hann teldi að það væri svona auðvelt að dæma fótboltaleik þá ætti hann bara að prófa það sjálfur. Marciniak tók hann á orðinu og var innan nokkurra vikna mættur á dómaranámskeið.
Hann hefur dæmt í efstu deild Póllands síðan 2009 og verið alþjóðlegur FIFA-dómari síðan 2011. Það fylgir reyndar sögunni að eftir að Marciniak hafði dæmt í nokkur ár þá hitti hann umræddan dómara sem rak hann af velli á sínum tíma. Marciniak notaði þá tækifærið, baðst afsökunar og viðurkenndi að rauða spjaldið hefði nú verið réttur dómur. Þeir eru ágætis vinir í dag og hafa m.a.s. dæmt leiki saman. Allt er gott sem endar vel!
Marciniak hefur gott orð á sér og þykir góður í að stjórna leikjum og aðstæðum. Eitthvað sem mun koma sér vel í leik í Tyrklandi þar sem mikið er undir, áhorfendur með gríðarleg læti og hætt við að leikmenn geti orðið pirraðir og örvæntingafullir. Marciniak þekkir það vel sjálfur að leikmenn vilja stundum fá að pústa og hann gefur ákveðið svigrúm til þess án þess þó að vilja að það fari úr böndunum.
Hann sést ekkert endilega mikið í leikjum en það þýðir þó ekki að hann hafi ekki stjórn á þeim. Hann getur líka alveg látið leikmenn vita fyllilega af því hver það er sem stjórnar þarna á vellinum. Heilt yfir vill hann þó halda þessu á mjúku nótunum. Hann er yfirleitt góður í því að eiga við leikmenn, samskiptin eru góð og viðvaranir ef þarf. Hann hefur góðan leikskilning og er í virkilega góðu líkamlegu formi sjálfur. Hann greinir brot vel og þykir beita hagnaðarreglunni mjög vel.
Hann mætti þó stundum vera með betri staðsetningar, til dæmis í föstum leikatriðum. Þá hefur hann ekki alltaf náð rétt atvikum sem varða hættuleg brot eða leikaraskap. Svo mættu samskipti hans við aðstoðardómara sína vera betri. En hann er mjög áhugasamur um að læra og bæta sig svo þetta ætti nú allt að koma hjá honum.
Heilt yfir verður varla sagt að við hefðum getað beðið um mikið betri dómara fyrir þetta tilefni. Svo skemmir það nú ekki fyrir að hann dæmdi einnig leik Íslands og Austurríkis á EM í Frakklandi. Þar stóð hann sig glimrandi vel, sérstaklega þegar kom að viðbættum uppbótartíma.